Gobièrnu di Kòrsou ke skonde patras di mesa bèrdè.

Gobièrnu di Kòrsou ku su mal gobernashon, froude, korupshon i konspirashon, ta fòrsa batata kayente den koro koro di korte di hustisia

Ernest (‘Onchi’) Cohen Henriquez konsientemente, 48 aña pasa den e buki “Honderd jaar codificatie in de Nerderlandse Antillen”, a remarka ku e herensha di Malpais alias Gatu ta soshal i hurídikamente interesante, probablemente pasombra e tabata sa ku despues di 150 aña ta difísil pa haña sa unda tur e herederonan di e 13 katibunan liberá Rasveldt ta. Ta p’esei mes ela bisa ku atrobe lo mester wòrdu improvisá.

Ernest (‘Onchi’) Cohen Henriquez tabata un notario na Kòrsou entre 1946 i 1969. E tabatin un kantor den Punda, kaminda e tabata gusta yuda e hòmber chikitu ku bon konseho. Novèmber 1968, Ernest (‘Onchi’) Cohen Henriquez, a papia ku Gerardus Lazaro Ferero ku tabata un heredero di e 13 katibunan liberá Rasveldt. Gerardus Lazaro Ferero tabatin su titulo komo doño i un akta di herensha original di 21 febrüari 1812 ku e a haña di su mama ku tambe a haña esei di su wela. Gerardus Lazaro Ferero a pidi yudansa di Ernest (‘Onchi’) Cohen Henriquez pa bende plantashon Malpais. Ernest (‘Onchi’) Cohen Henriquez a rekonosé e akta ku Gerardus tabatin huntu kuné, tabata un akta original kaminda ku e 13 katibunan liberá Rasveldt a haña nan parti di e herensha di Sybrecht van Uytrecht. Hasta Ernest (‘Onchi’) Cohen Henriquez a verifiká ku tur asuntu hurídiko, despues ku señora Sybrecht van Uytrecht a fayesé, a wòrdu regla dor di dos ehekutor di herensha renombrá pa Sybrecht van Uytrecht, ku tabata yama Cornelis Ringeling i Gotlieb Frederik Ziegler.

Anke ku Ernest (‘Onchi’) Cohen Henriquez tabata konvensí ku dilanti di dje tabata para un desendiente di e 13 katibunan liberá Rasveldt, tòg Ernest (‘Onchi’) Cohen Henriquez a skirbi den su rapòrt ku ta difísil pa despues di 150 aña lokalisá tur e herederonan di e katibunan liberá Rasveldt.  Ernest (‘Onchi’) Cohen Henriquez tabatin bon bista politikko i tabata sa ku e herensha tabata sosialmente i hurídikamente hopi interesante. Ta p’esei tambe Ernest (‘Onchi’) Cohen Henriquez a skirbi den su rapòrt:” ... akinan tambe atrobe mester wòrdu improvisá.”

Huisio sumario 29 mart 2017

Norwin Gerónimo Ferero a entregá un petishon pa un kaso den korte riba 8 di mart 2017. Ta te 29 di mart, despues di 21 dia, e kaso a yega korte. E demanda den korte  ta pasombra públikamente Pietersz ta keda ignorá pa kumpli ku veredikto nan di korte i asina ta okashoná ku herederonan di katibunan liberá Rasveldt ta wòrdu perhudiká finansieramente.

Petishon pa kaso den korte:  Verzoekschrift 29-3-17

Promé ku e kaso a kuminsá, Norwin Ferero a puntra abogado Peter Verton ku e mes por a duna un motivashon di e demandanan hasí.

Na kuminsamentu di e kaso Norwin Ferero a bisa lo sigiente:

“Ta mas kla ku di dia ku Pietersz nan riba un forma inhustu ke bira doño di un parti di plantashon Malpais. Miembronan di famia Pietersz tin un akuerdo ku krímen organisá i nan ta terorisá terkamente e doño legítimo nan di plantashon Malpais.

Louis Eusebio Pietersz i Willem Jan Materno Pietersz nò tin derechi legítimo  pa stroba desaroyo di plantashon Malpais.
Den verediktonan di korte di Kasashon a stipulá kaba ku Pietersz nò ta doño ni propietario. E veredikto di e huisio sumario di 30 di desèmber 2015, number KG 76617/2015, a afirmá pa korte di apelashon ku tabatin un veredikto riba 13 di Sèptèmber 2016 number KG 76617-H172 i 172A/16, a stipulá ku Pietersz nò ta Vito tampoko.

Louis Eusebio Pietersz i Willem Jan Materno Pietersz terkamente a keda nenga pa duna oido i stòp di hasi negoshi riba terenonan ku ta pertenesé na plantashon Malpais. Hasta un multa di 100.000 florin ku korte a pone, nò ta hasi niun impreshon riba Pietersz. Ketu bai Pietersz ta keda ignorá verediktonan i ketu bai Pietersz ta terorisá herederonan. Hasta Pietersz por a regla ku riba 29 di mei 2016 Tele Kòrsou a mustra den telenotisia kon Pietersz ta hasi un veredikto di korte ridíkulo. Korte su veredikto a bisa bon kla ku tur bòrchi mester wòrdu kita, pero Pietersz ta demonstrá riba telenotisia  kon nan si por pone un bòrchi nobo. Te ainda tin un video riba You Tube “KITA BORHI NA GATO”. E video aki a wòrdu mira 287 bia kaba.
Abogado Peter Verton tambe ta wòrdu intimidá dor di Pietersznan i awor e tin asina miedu ku e nò por defendé e kaso di Norwin Ferero manera debe ser.

Motivashon di demandanan hasí: Motivatie verzoekkschrift

Durante di e kaso abogado Peter Verton a primintí di manda mas prueba via di Internèt. Abogado Peter Verton a pidi Norwin Ferero pa manda e pruebanan via Internèt. Esaki a bira un file di 34 página.

File di 34 pagina: epistel

Abogado Bijkerk, nò a wòrdu impreshoná dor di tur e akusashonnan pero a ignorá tur kos. Ela keda hasi manera su kara nò tin wesu i a sigui ku e mes un pensamentu ku Ernest ‘Onchi’ Cohen Henriquez tabatin na aña 1969. Abogado Bijkerk a ignorá tur e demandanan i riba un rùst ela sigui splika detayadamente kon Pietersznan ta ignorá verediktonan di korte. Abogado Bijkerk tabata sa kon konvensé wes pa tolerá e inhustisia di Pietersznan.

Wes a sukumbí kompletamente pa e “kuenta bunita nan” di abogado Bijkerk i nan dos a uni kompletamente ku e pensamentunan di Ernest ‘Onchi’ Cohen Henriquez. Wes tambe a kuminsá prediká den e huisio sumario splikando dikon ta asina difísil pa lokalisá e herederonan di e 13 katibunan liberá Rasveldt. Hasta wes a tira mas ariba i bisa ku ni aki un mion aña herederonan lo haña un veredikto den e kaso di e herensha di plantashon Malpais. Sigun wes nò tin niun otro opshon ku ta e aplikashon di artíkulo 3:200a e.v. BW (casonan di tereno ku tin hopi tempu pará sin solushon).
Seguidamente Norwin Ferero a wòrdu yama dilanti i wes a bis’é: señor Norwin Ferero, sea asina sabi pa uni bo mes ku e otronan den e prosedura pa repartí tereno. Norwin Ferero a splika bon kla ku e tambe lo uni su mes den e prosedura pa repartí tereno sigun artíkulo 3:200a. Tambe Norwin Ferero a mustra bon kla ku e demanda di e huisio sumario nò ta trata pa sa ken ta doño, sino ku korte mester sentensia Pietersznan pasombra nan ta ignorá diferente veredikto di korte. Norwin Ferero a pidi korte un veredikto di moda ku esei por wòrdu usa den korte dia 25 di aprel 2017.

Veredikto huisio sumario

Tur loke wes a bisa den korte ta parse ku djarason otro siman, dia 11 di aprel, tur puitunan lo sali foi makutu i e bèrdat lo sali na kla. Tur hende lo haña sa si tin hustisia aki na Kòrsou òf nò.

Polítikonan goloso

Polítikonan di mala fe “boluntariamente” a laga nan mes wòrdu kumprá i nan mes gana di kos tambe a pone nan bende nan alma ku diabel. Nan a sera kompromisonan figo ku krímen organisá. Seguidamente parlamentarionan a kuminsá terorisá nos Pais Kòrsou ku mal gobernashon ku ta wòrdu mantené dor di aktonan di teror di un kadena di kriminalnan ku a studia lei na universidat.

Awor si a bira mas kla ku di dia ku Doktoor Frumencio da Costa Gomez
mester  tabata papia ku huristanan ora ku e tabata bisa:

NO HASI KU OTRO LOKE BO

NO TA DESEA KU OTRO HASI KU BO